عدد المساهمات : 838 نقاط : 1544 السٌّمعَة : 0 تاريخ التسجيل : 03/08/2012
موضوع: ألعابنا قبل ! الإثنين مارس 04, 2013 4:54 am
السلام عليكم و رحمة الله و بركاته
طروا على بالي مساعة ألعاب كنا نلعبها قبل .. تقدرون تسمونها ألعاب منسية .. غير الخشيشة و الصييدة و البي بي عمبر و التيل و السكينة ، هذي ألعاب شعبية و كلمن يعرفها أنا ياي أتكلم عن ألعاب كنا نلعبها يوم كنا صغار لين نتيمع بيت يدتي أو بيت خالتي .. باذكر جمن لعبة طروا على بالي و باشرحهم .. و اللي عنده اضافه حياه الله
1- جدتي يا جدتي :
في هللعبة نتيمع احنا كذا واحد مايهم العدد .. و نعين أول شي واحد و هو الجدة .. فكرة اللعبة انه اليهال يتفقون على اسم فاكهه أو خضرة و يحطونها في بالهم و يقولون حق الجدة الحرف الأول من اسم هذي الفاكهه و عقب الجدة تحاول تحزرها ..
فتبتدي اللعبة بقول اليهال : جدتي يا جدتي ترد عليهم الجدة : وين كنتوا اليهال : في البستان الجدة : إيش أكلتوا اليهال : خربش بربش حرف الطاء
هني الجدة تحاول تحزر اسم هذي الفاكهه و لها من المحاولات ماشاء الله .. و لين عرفت اسم الفاكهه ( طماطة مثلا ) تختار واحد من اليهال على أساس يصير هو الجدة .. و هلم جرى .. أتذكر كنا نلعبها في بيت خالتي و كان عندهم الكرسي الهزاز ذي .. نخلي الجده تيلس على الكرسي و نلبسها نظارة و اذا في قطعة خلق شي نعطيها في يدها .. نعيش الدور صح
2- سويره و بنتها :
هذي اللعبة اسلوبها عكس اسلوب لعبة جدتي يا جدتي .. في هذي اللعبة الشخص الواحد ( نسميه القائد مثلا ) هو اللي يسأل و اليهال يحاولون يحزرون الاجابة الصحيحة .. طريقة اللعبة هي انه القائد يحط في باله اسم أحد من اللي يصيرون له .. و اليهال اللي وياه يحاولون يعرفون من هو هذا الشخص عن طريج عدد عياله من أولاد أو بنات اللي القائد يقوله لهم .. و تكون اللعبة على النحو التالي :
القائد : سويره و بنتها اليهال : عرفنا من تحتها القائد : تحتها الله يسلمكم .. بنتين وولد
و هني اليهال يبتجون يحاولون يحزرون الشخص ، و اللي تكون اجابته صح يصير هو القائد طبعا من شروط اللعبة انه اللي يلعبون كلهم يصيرون حق بعض على اساس كلهم يعرفون انسابهم .. و هلم جرى ..
3- جيكي جيكي بم بم :
أعتقد تعرفونها لا ؟ اللي باليد .. جيكي جيكي ( اليد مصكوكه - بوكس - ) بم بم ( اليد مفتوحة - كف - )
و يصير الطق .. جيكي جيكي بم بم جيكي جيكي بم بم جيكي بم جيكي بم جيكي جيكي بم بم .. و يتنافسون على اللي يسوون أسرع
4- تقع الحرب في بلاد :
اليهال كل واحد يختار له اسم بلد .. عقب يتيمعون اليهال و يسوون دائرة و يخلوون واحد بالنص ..
عقب يقولون : تقع الحرب في بلاد .. .. .. .. .. الكويت !! اللي بالنص لازم يقول في أقصى سرعة ممكنة بعد قول اسم البلد : ستوب ! و يفتر لي الياهل اللي هو دولته الكويت و يقول لليهال اني باوصل له مثلا في 7 خطوات .. و يبتدي يمشي و يحسبون له الخطوات .. اذا وصل في 7 خطوات يفوز و الل صاده يصير بالنص ، و اذا ماوصل في سبع خطوات يتم بالنص و تستمر اللعبة ..
---------> بس كأنه اللعبة شوي غلط .. ماتذكرها لأن من زمان مالعبتها .. اذا في أحد يصلحلي ؟
5- أمره شمره :
كنا نلعبها في السطح .. فن نتيمع و كل واحد يختارله اسم من الأسماء التالية :
أمره شمره شمس نجوم كواكب هوا لعب الدوا
و اللعبة تكون عبارة عن نط الحبل .. ثنين يوودون الحبل من الصوبين و واحد بالنص ينط .. و يبتدون اليهال يقولون : أمره شمره شمس نجوم ، كواكب هوا ، لعب الدوا
و يكررون لين اللي ينط يصيده الحبل ، و يشوفون صاده الحبل عند أي إسم ؟ مثلا صاده الحبل و هم يقولون ( شمس ) فاللي مختار اسم شمس يروح ينط الحبل .. و هكذا
هذي الألعاب اللي حضرتني حاليا ، أكيد في ألعاب وايد بس مو متذكر منها الا هذلين .. فاللي عنده اضافة يتفضل يقولنا و طبعا هذي الألعاب كانوا الجنسين يلعبونها ، يعني مختلط .. ماكان في أي إشكالية قبل و كنا يهال طبعا فلا حرج
و طبعا كل الألعاب السابقة قد تختلف من ناس و ناس ، فيعني عادي للعبة الوحده 10 نسخ فنقول في نهاية الموضوع ،أو كما قال القائلون