بيت التراث الهجَري ـ الأحساء - تأسس عام 2009م -

مرحباً بكم في بيت التراث الهجَري, كلمة الهجري منسوبة لإقليم هجر شرق الجزيرة العربية الأحساء حاليًا . كانت الأحساء قديما تمتد من البصرة حتى عُمان .
 
الرئيسيةالبوابةاليوميةمكتبة الصورس .و .جبحـثالتسجيلدخول
<div style="background-color: none transparent;"><a href="http://www.rsspump.com/?web_widget/rss_ticker/news_widget" title="News Widget">News Widget</a></div>

شاطر | 
 

 ياالله صباح خير

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
تمريّون
Admin
avatar

عدد المساهمات : 838
نقاط : 1544
السٌّمعَة : 0
تاريخ التسجيل : 03/08/2012

مُساهمةموضوع: ياالله صباح خير    الأحد مايو 10, 2015 4:46 pm

صباح الخير يادويجنا الابيض


روي عن النبي ص .. بورك لأمتي في بكورها


هالحين احنا في هالشهر شهر مايو الحار .. وشهور الصيف الياية كلها حر ورطوبة  ..


متى الناس بتطلع من بيوتها ؟


لحمت الشمس .. وشبت الدنيا


تو الناس تطلع من بيوتها


الاول الناس مواقيتهم مع الشمس .. متماشيين مع الي يريده الله


الشمس اليوم في الحسا تطلع الساعة خمس 5 صباحا .. وهالحين الساعة ست 6 ص


كان العرب الاول .. متوافقين مع الطبيعة .. وحتى البهايم والطيور .. تسرح من فجر الله


النهار شغل .. والليل نوم على سجية الخالق سبحانه ....


وهالايام الناس تغيروا .. سبحان الي يغير ولايتغير .. والبهايم والحمدلله على سجيتهم .. على خلقة ربهم  ..


الناس غيرتهم المكاين والكهربا


والبهايم والطيور على سجيتهم .. ماتغيروا وﻻتبدلوا


يرقدون في الليل ويقعدون من فجر الله من الصبح  ...


واﻷوادم صارت تتحكم فيه آلة أهوه صنعها ... ماعدا النخلاوية طبعا مابرحوا على سجيتهم ..


حكم اﻵدمي على نفسه في هالزمن ... عدام صحته وعافيته وقلة البركة .. بيجي واحد مثليه وشروايه .. ويبي يتفلسف  عليكم.. وبيقول ﻻتقسروا أبناءكم على أخﻻقكم .. فإنهم خلقوا لزمان غير زمانكم ..


أقول حق روحيه .. هذا الكﻻم مهب صحيح  .. فليس كل تغيير نعتبره تطور وحضارة .. مثﻻ .. هل أكل المعلبات واﻷكل المصبر تمدن وتطور .. أم أكلنا المعدل وراثيا أحسن من ذيج الايام ؟.. أيام ماكانوا ابهاتنا ياكلون اللحمة في وقتها واللحمة طازجة وماعرفوا التجميد وﻻ المسه التطعيم الي ماعرفوه أهالينا الاول .. ..ومثال ثاني .. هل ستر حريم هالايام أحسن من ستر حريمنا الاول .. عشان أتحجج وأقول .. أبناؤكم خلقوا لزمان غير زمانكم


هل اﻷكل يتطور ياعرب ؟


هل الحجاب يتطور ياناس ؟


هل الدين يتطور يامسلمين ؟


لكن .. هل نقول صناعة الساعات والمكاين تطورت ؟

نقول نعم ثﻻث مرات .. ايه  نعم تطورت ..وإذا تطورت التقنية والساعات ....


فهل يحق لي لما تتطور صناعة الساعات .. وصناعة المعلبات .. أخالف الفطرة والطبيعة .. ونقص على روحنا .. ان الزمن تطور .. ونترك الي ربونا عليه أهلينا .. ونترك أصلنا وفصلنا .. وطبيعتنا



هذا مهب تطور .. بل تضييع للصحة والعافية ..  واستخفاف بالستر والحجاب .. هذيه مهب تقدم وﻻ تطور .. بل نسميه  تخلف وتهور ..


ياحساوية يامتمدنين يامتطورين .. الله يصلحكم ويصلحني قبلكم كلنا نحب التطور والتحضر .. بس ماننسلخ عن أصلنا وفصلنا ..


الشجرة كل سنة اتجدد القشر الي على جذعها وكل سنة يحت ورقها ويتجدد .. لكن الشيرة أبد ماتغير ألوانها وﻻ تبدل ثمرها ..


كان شيبانا الاولين عندهم ساعة سويسرية اسمها وست ان .. كانوا يعشونها كل مغربية .. ويضبطونها على الساعة 12 .. وكان والدي محمد إلى أن مات .. مابرح يعشي ساعته .


نرجع ونسأل أنفسنا .. من صلينا الفجر لي هالحين .. كم ساعة واحنا في مراقدنا..
هالحين من اطلعت الشمس الساعة 5 ليما يحين وقت الدوام الساعة 7 ونص كم راح من النهار .. من متى والشمس طالعة ؟
وكم درجة ارتفعت الحرارة ...
ﻻحول وﻻقوة إﻻ بالله العلي العظيم
على مايبتدون الناس الدوام .. جد الدنيا شبت واﻷرض .. ولعت ..  شنهو الفايدة .. والنبي صلى الله عليه وآله حذر الناس من نومة الصفرة .. أي وقت شروق الشمس .. ﻷن فيها مضرة على البدن .. وضياع لﻷرزاق والعباد ..
عشان جذيه في هالزمن قلت البركة في اﻷعمار واﻷرزاق .. وظل كثير من الناس بﻻ عمل وﻻ سكن وبﻻ عرس وبﻻ نخل ..  واضعفت في بلدنا الحسا .. اﻷعمال الحرة واضعفت اﻷسواق الشعبية وضاعت في بلد أم الخير الخيرات .. وضاع الماي ونشفت العيون ..
الحسا لول ياناس يسمونها منبع الحرف والمهن الصناعية ..
هالحين في كل بيت الخبز زايد والقليل من يحفظ النعمة ..
والمجﻻت فيها اسم الله تعالى والقليل من يحفظها ..
والكثير دخل في بيته الكتب الفاسدة والمنحرفة ..
وماباقي إﻻ القليل الي مايسهر  والي المفروض على كل مومن أنه يحصن بيته أول شي .. ثم يحصن اﻹنسان بيت غيره .. يسهر على شان يطالع المسلسﻻت الفاسدة في بيته والي تسل الخير كله من البيت ومن راعي البيت .. مايدري عن حال والديه وﻻ جيرانه .. وبعدها مايقدر يقوم يصلي الفجر .. وإذا صلى الفجر .. عود انجفس في فراشه للساعة 7 ونص .
كانوا شيبانا الاولين .. لما يتعشون يتعتمون وينامون من أول الليل ... ويقول المثل الحساوي .. ارقاد أول الليل عافية .
كانوا الاولين ييلسون مع أذان الاولي وقبل ماتطير الطيور بارزاقها .. ويصلي الفير ويفطر ويتوكل على الله لمهنته وحرفته ونخله .
وكانت حريم الاول تقعد من النوم وتعلف البقرة وتحلبها قبل صﻻة الفير كانوا يطلعون من صباح الله خير يغسلون امواعينهم واهدموهم في الثبر ويروون للبيت من الثبر قبل ماتحمى الشمس قبل مايصير الجو عليهم صاهي .
أتذكر سوالف ربعنا .. يقولون ياويل من تأخر عن صﻻة الفير .. مافيه إﻻ التليل يمسده ابوه على اظهره .. هذا ومابعد يسفر الوقت .. ويدعي على اولده ذيج الدعاوي الزينة .. هههه.. يالكافر .. ياليهودي .. استوى العصر وﻻ قمت اتصلي .
بين قوسين تعليق وليس اعتراض (أجل مادام انه يهودي .. اشلك به تقعده يصلي ) هههه الله يرحم ذيج الشيبان وبيض الله اوجيههم ... طلعوا رياييل .
يقول لي صاحب صديق .. أنه كان نايم عندهم ضيف ذيج الليلة .. وجاهم ابوهم يقعدهم للصﻻة .. وهو يسبهم ويقول لهم ياليهود ماتقومون اتصلون وهم ماتحركوا من محلهم .. ارقود.. ويحول بالعصا على واحد فيهم ويوميه على اظهره .. وﻻجات إﻻ على الضيف .. ويصرخ من قوة الضربة .. على باله كلهم اعياله .
وواحد ثاني يسولف عليه .. يقول كنا نايمين في السطح .. وجا ابويه يقعدنا وﻻنه توه يسفر الوقت .. ويجينا بذاك التليل واقوم بالقوة .. وأما اخويه .. انحاش وكان ماعليه إﻻ سروال قصير .. ومن الخوف طلع الشارع بسرواله .. والوالد يسب فيه ويعق .. يالكافر ياليهودي يالنصراني .. بتنزل علينا السخط .. بيحول علينا البلا من سبتكم .
وفيه واحد أمه خيرة حيل .. تقعد دائمل مع أذان الاولي .. يقول إذا فاتتها (وفي السالف تفوتها) صﻻة الفجر في أول الوقت .. انتبه قلنا في أول الوقت يعني بداية مايسفر الوقت  .. تقوم تتحلطم وتستغفر من الصبح للظهر .. وتقول اليوم كفرنا الله يعفي ويتوب .. ماصلينا مثل المسلمين .. الله مهب راضي علينا اليوم .
أجي أقارن زمنا هذيه بحالنا أتأسف على أحوالنا .. هاذي أحوال ياغيووور  .. ﻻ مهب أحوال .. هاذي حالة اليوم ترضي ربنا يامومنين .
أسف والله مع الأسف اﻹنسان من عادته جاحد للنعمة  .. يقول ليه شايب خير مومن .. لو ابوديه .. جان مايأذن العشا إﻻ ومافي الديرة كهرب .. وديه يطفونها ونرتاح .. بس ( الحجي) الحكي الثﻻجات يخرب اﻷكل الي فيها .
كانت الحسا لول .. أم النخل وأم التمر وأم الصنايع وأم الحرف .. وتصدر خيراتها لجيرانها .. اليوم راحت كل الخيرات والبركة .. راحت مع أهلها الطيبين
كان ابويه النخﻻوي الله يرحمه يحذرنا من نومة الصفرة ومن التلفزيون وﻻمرة شفته نايم بعد صﻻة الفير .
واحنا ماكو فايدة ننام ونعطيه اﻷذن الصمخة الله يعفي ويتوب .
سﻻمي على الطيبين أمثالكم
أخوكم يوسف العبداللطيف آل مبارك
من اﻷحساء في يوم اﻷحد 21 من رجب 1436هـ







_________________

الرجوع الى أعلى الصفحة اذهب الى الأسفل
تمريّون
Admin
avatar

عدد المساهمات : 838
نقاط : 1544
السٌّمعَة : 0
تاريخ التسجيل : 03/08/2012

مُساهمةموضوع: رد: ياالله صباح خير    الأربعاء يونيو 17, 2015 11:18 pm

الفكر الغربي 
غزا الناس في ثقافتهم 
يكادون ينسةن ثقافة النجوم والفلك التي ورثناها عن آبائنا
يكاد الناس ينسون حركة الشمس .. ولكن الصﻻة مفروضة .. تذكرهم بتغير حركة الفلك .. كانت على المؤمنين كتابا موقوتا ..
يكادون ينسون حركة الأهلة في كل شهر .. لكن يأتي شهر الخير شهر البركة شهر رمضان  .. فيربطهم بعلم الفلك وثقافة اﻷنواء ومواقع النجوم .. يسألونك عن اﻷهلة .. قل هي مواقيت للناس .
رحم الله آباءنا .. عندما كانوا يعشون ساعاتهم عند وقت أذان المغرب .
رحم الله أجدادنا الذين كانت ساعتهم النهارية الشمس وأوقات دوامهم مع طلوع الشمس .. 
وكان منتصف النهار عندهم مع الشمس ..
وكان منتصف الليل يحسب مع الطلوعين ...
عزيزي الذي لم يعش حياة اﻷجداد قبل ربع قرن .. أما زلت تظن .. أن منتصف النهار الساعة 12 ومنتصف الليل الساعة 12 .. إذن طالع التقويم .. 
لترى من هم اﻷدق عمليا واﻷكثر تماشيا مع طبيعة البيئة واﻷكثر التصاقا بنواميس الطبيعة والتعاليم السماوية  قومك أم قوم أبوكبوس الملتصق بالماديات والمغتر بمكينته والمغير لخلق الله ؟

_________________

الرجوع الى أعلى الصفحة اذهب الى الأسفل
 
ياالله صباح خير
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
بيت التراث الهجَري ـ الأحساء - تأسس عام 2009م - :: المأثورات الشعبية :: التقاليد والموروثات-
انتقل الى: